مستشارك الأمين

للصحة والجمال

الرعاية الصحية

الحساسية الموسمية في الشتاء، أسبابها وأنواعها وعلاجها

لو عندك حساسية من حبوب اللقاح (Pollen allergy) هتحس إن الشتاء مريح وبيخلصك من الحساسية، لكن لو عندك حساسية موسمية بتظهر في الشتاء يبقى لازم تقرأ المقال ده.

الأسباب:

في الشتاء بيزيد التراب والفطريات الدقيقة في الجو وبقايا الحشرات وغيره، الحاجات دي بتدخل في الجهاز التنفسي وبتسبب رد فعل تحسسي من الجسم أو ما يسمى بالحساسية الموسمية، فيه أسباب رئيسية للحساسية الموسمية ممكن نقول مثلًا:

1. حشرة عتة الغبار Dust Mites : دي مختلفة عن العتة العادية اللي بتبقى في الهدوم، حشرة صغيرة جدًا جدًا لا ترى بالعين المجردة، بتبقى موجودة في المراتب والملايات وبقاياها أو هي نفسها ممكن تطير مع الهوا وتسبب أعراض حساسية.

2. الفطريات وبقاياها المنتشرة في الهواء Mold : فطر عفن الخبز بيبقى فيه مستعمرات كده اسمها spores  حجمها صغير جدًا وبتنتقل عن طريق الهواء وبرضو بتسبب أعراض حساسية.

3. الحيوانات المنزلية: فيه ناس بتبقى فاكرة إن عندها حساسية من فرو القطط أو الكلاب، لكن ده نادر جدًآ في الحقيقة لكن ناس كتير عندها حساسية من نوع بروتينات معين (في الكلاب اسمه IgE-binding proteins ) موجود في بول ولعاب الحيوانات الأليفة.

الأعراض:

أعراض الحساسية بتبقى متشابهة سواء حساسية ربيع اللي بتبقى من حبوب اللقاح أو حساسية شتاء اللي من الأسباب السابقة، الأعراض بتبقى:

_ كحة وعطس

_ سواد تحت العين

_ حكة في العين والأنف

_ دموع غزيرة من العين

الأعراض دي ممكن تتشابه مع أعراض نزلة البرد العادية، لكن ممكن تفرق بينهم بالحاجات دي:

- نزلة البرد آخرها ١٠ أيام  لكن أعراض الحساسية بتستمر لفترة طويلة جدًا ممكن تكون طول الشتا، 

- أعراض نزلة البرد بيكون معاها ارتفاع درجة الحرارة وآلام في الجسم لكن الحساسية مش بيكون معاها الحاجات دي

طبعًا الكلام ده لا يعني إنك تقدر تشخص الحساسية بنفسك، لازم دكتور يشوفك ويقولك الأعراض اللي عندك دي حساسية ولا أي حاجة تانية.


(المعلومات الطبية في الإنترنت لغرض التوعية فقط ولا تصلح كمصدر للتشخيص أو العلاج)

العلاج والوقاية:

لما الدكتور بيشخص حالتك إنها حساسية موسمية غالبًا بيديك مضاد للهيستامين ( (Antihistaminesأو مضادات احتقان ((Decongestant أو علاج مناعي بيقوي مناعتك ((Immunotherapy أو ميكس من الحاجات دي أو أي بروتوكول علاجي يشوفه الطبيب مناسب لحالتك، لكن فيه حاجات معينة ممكن تعملها للوقاية.

- ابعد عن مصادر الحساسية زي لو عندك حساسية من الكلاب أو القطط أبعد عنها للوقاية

- استخدم فلتر لتنقية الهواء من التراب والشوائب

- لو عندك حساسية من عتة الغبار اللي موجودة في الملايات والمخدات لازم تغسلها مرة في الأسبوع على الأقل، أو تستخدم أنواع قماش مناسبة لمرضى الحساسية، وفيه أنواع سبراي بتترش على السرير تحميك من مسببات الحساسية ممكن تسأل عنها في صيدلية عابدين