مستشارك الأمين

للصحة والجمال

الرعاية الصحية

نقص فيتامين د في الشتاء، السبب والحل

إيه علاقة فيتامين د بالشتاء؟

فيتامين د بيتصنع في جلد الإنسان وعشان يتصنع لازم الجلد يتعرض لأشعة الشمس بشكل كافي ومعتدل، في الشتاء الشمس بتغيب لفترات طويلة والناس عادة بتحب تفضل داخل البيوت وده بيخلي تعرضهم للشمس أقل بكتير من الصيف، وده بيعرضنا لخطر نقص تصنيع فيتامين د وبالتالي نقص الكالسيوم في الجسم. بالنسبة للحوامل نقص فيتامين د بيزود احتمالية الإصابة بسكر الحمل وتسمم الحمل الأولي.

إيه أنواع فيتامين د؟


فيه أنواع مختلفة من فيتامين د لكن الإنسان بيحتاج أكتر نوعين فيتامين د٣ اللي اسمه كوليكالسيفيرول وفيتامين د٢ اللي اسمه إرجوكالسيفيرول، الصيدلي عارفهم مش لازم تحفظ أسمائهم. المستحضرات اللي في الصيدلية وفيها فيتامين د بتبقى غالبًا إما د٢ أو د٣ أو ميكس من الاتنين.

إيه فايدة فيتامين د؟


فيتامين د مش زي باقي الفيتامينات، لما بيتكون في الجسم مش بيكون نشط لكن بتحصلله عملية تانية في الكبد والكلى  وبيتحول للشكل النشط المفيد. وفيتامين د مهم جدًا جدًا عشان بيحافظ على معدل الكالسيوم والماغنسيوم والفوسفات في الجسم. نقص فيتامين د في الكبار ممكن يسبب هشاشة عظام وفي الأطفال ممكن يسبب حاجات أخطر زي الكساح. فيتامين د كمان ليه دور ما في العلاج والوقاية من الاضطرابات/الأمراض دي:

- ضعف المناعة

- الاكتئاب الموسمي

- الأمراض المناعية

- بعض الأمراض الجلدية زي الإكزيما - الخرف المرتبط بالتقدم في السن

إيه علاج نقص فيتامين د؟

- التعرض لأشعة الشمس بشكل معتدل

- تناول أنواع أكل غنية بفيتامين د زي الأسماك البحرية (التونة والسالمون والماكريل) والحليب والبيض 

- ممكن تاخد مكملات غذائية تحتوي على فيتامين د ، جرعة ١٠ مكج (ميكروجرام) يوميًا، وبالنسبة للأطفال ممكن جرعة ٢٥ أو ٥٠ مكج يوميًا (استشير الصيدلي في صيدليات عابدين عن اسم الدواء المناسب)

- لا تتناول أبدًا جرعة أكتر من ١٠٠ مكج يوميًا من فيتامين د


(المعلومات الطبية في الإنترنت لغرض التوعية فقط ولا تغني عن استشارة الصيدلي)