مستشارك الأمين

للصحة والجمال

الرعاية الصحية

حافظ على قلبك فى عيد الحب
بمناسبة عيد الحب بنحتفل معاكم و نعرفكم أهم النصائح الضرورية للحفاظ على قلب صحى علشان تحافظوا على صحتكم و صحة اللى بتحبوهم:

اختيار الأكل الصح: لازم كل وجباتنا تحتوى على كمية مناسبة من الخضروات و الفاكهة اللى بتمدنا بالمعادن و الفيتامينات المطلوبة لصحة الجسم. كمان المفروض يبقى عندنا وجبة اسبوعية من المأكولات البحرية الغنية بمضادات الأكسدة المفيدة لصحة القلب. أما اللحوم فهى ضرورية طبعاً و لكن أكلنا منها لازم يكون بكمية معتدلة بدون افراط علشان اللحوم بتحتوى على قدر عالى من الدهون و يفضل أكل اللحوم المشوية. كمان يفضل عدم تناول الوجبات السريعة بكثرة
ممارسة الرياضة: مش معنى اننا نمارس الرياضة اننا محتاجين أيام متواصلة فى الجيم أو النادى! المشى أو الجرى – طبعاً الجرى أفضل – يومياً بين 20 -30 دقيقة كافى كبداية للحفاظ على نشاط الجسم بشكل عام. و لو فى رياضة بتحبها و تقدر تمارسها النتيجة هتكون أفضل بكثير
التوقف عن التدخين: التدخين أهم الأسباب المؤدية إلى الاصابة بأمراض الشرايين و القلب بالاضافة إلى مشاكل الرئتين، جرب تبطل التدخين و هتحس بالفرق فى أول اسبوع
المتابعة الطبية: تعتبر المتابعة الطبية عن طريق قياس الضغط و نسب الكوليستيرول بأنواعه فى الدم من أهم المؤشرات اللى بتعرفنا مدى الخطورة اللى القلب بيتعرضلها

الاندماج في الحياة الاجتماعية: بما انه عيد الحب فمن المهم اننا نهتم بالحب فعلاً عن طريق زيارة الأقارب و الأصدقاء و الأحباب و تعبر لهم عن حبك لهم و هما يعبروا عن حبهم لك لأن الشعور بالحب و الرعاية و الاهتمام و السعادة بشكل عام من الأمور اللى بتحافظ على القلب و صحته


صيدليات عابدين
مستشارك الأمين للصحة والجمال