مستشارك الأمين

للصحة والجمال

الرعاية الصحية

اعرفي أكتر عن سكر الحمل

ما هو سكر الحمل؟

لازم تعرفي إن مرض السكر فيه منه نوعين أساسيين شائعين وهما السكر من النوع الأول (وده بيحصل لأسباب وراثية نتيجة نقص إفراز الإنسولين في الجسم) والسكر من النوع الثاني (وده بيحصل غالبًا لكبار السن وبيكون غير مرتبط بالإنسولين) بالإضافة لنوع غير شائع وهو السكر من النوع الثالث، وده مرتبط بمرض الألزهايمر، النوع الأخير هو سكر الحمل.

سكر الحمل هو اضطراب مستوى السكر في الدم أثناء فترة الحمل، لو حصل وجالك سكر الحمل يبقى أنتي معرضة أكتر للإصابة بالسكر من النوع التاني حتى بعد الولادة ولازم تاخدي احتياطاتك عشان تمنعي ده، وتلتزمي بستايل حياة صحي ونظام غذائي متوازن.

 

هل سكر الحمل منتشر؟

أيوة، حوالي ٥٪ من السيدات الحوامل بيصابوا بسكر الحمل، لكنه غالبًا بيختفي بعد الولادة لكن ممكن يتطور لسكر من النوع التاني، مش أكيد لكن وارد.

 

ازاي أعرف إني معرضة لسكر الحمل؟

فيه عوامل لو عندك منها عامل أو أكثر تبقي معرضة للإصابة بسكر الحمل، كل ما يزيد عدد العوامل اللي عندك كل ما احتمالية الإصابة تزيد، العوامل دي هي:

-           السن، السيدات أكبر من ٢٥ سنة معرضات أكثر من غيرهم للإصابة بسكر الحمل، لكنه يعتبر أضعف عامل

-           البدانة: بدانة الجسم بتخليكي معرضة أكتر للإصابة بسكر الحمل

-           تكيس المبايض: لو كنتي بتعاني من متلازمة تكيس المبايض تبقي معرضة أكتر من غيرك للإصابة بسكر الحمل

-           الإصابة السابقة: في ولاداتك السابقة لو كان جالك سكر حمل ده يخلي فيه احتمال عالي إنه يجيلك تاني


إيه علاج سكر الحمل؟

زي باقي أنواع السكر، سكر الحمل يمكن السيطرة عليه ولا يمكن علاجه، أعراض سكر الحمل عادةً بتظهر بوضوح في الثلث الأخير من الحمل لكن الطبيب هيعملك اختبار سكر في نهاية الثلث الأول وفي نهاية الثلث التاني، ولو ظهرت عندك أعراض سكر حمل لازم تلتزمي بالنظام الغذائي اللي بينصحك بيه الدكتور وممكن يوصفلك أدوية.

هيحصل إيه لو تجاهلت سكر الحمل؟

سكر الحمل عادةً مش بيسبب أي أضرار لو تمت السيطرة عليه، لكن المضاعفات عند تجاهله مش بس بتضر الأم، لكنها كمان بتضر الجنين لأنه ممكن يتولد بوزن زائد وباحتمالية عالية للإصابة بمرض السكر، عشان تحافظي على نفسك وعلى طفلك التزمي بتحاليل اكتشاف سكر الحمل، والتزمي بالنظام الغذائي أو الأدوية اللي هينصحك بيهم الطبيب.