مستشارك الأمين

للصحة والجمال

الرعاية الصحية

زيادة الوزن بعد سن الخمسين، الأسباب والحلول

 كتير بيشتكوا إن كان وزنهم عادي وبدأت مشاكل السمنة والبدانة وزيادة الوزن تظهر بعد سن الخمسين، الموضوع ده يعتبر طبيعي نتيجة تغيرات معينة في الجسم لكن في نفس الوقت ليه حلول، في المقال ده من صيدليات عابدين هنقولك ليه وزنك بيزيد مع التقدم في السن ووسائل التخلص من المشكلة دي.

 

أولًا إيه الأسباب؟

الجسم بيمر بتغيرات كتير على مستويات مختلفة مع التقدم في السن وبيكون سبب زيادة الوزن:

-       الهرمونات: الهرمونات هي اللي بتحرك الجسم البشري، كل هرمون مسئول عن وظيفة أو مجموعة وظائف معينة، الهرمونات بتفرز بكميات قليلة جدًا جدًا جدًا لكن أهميتها كبيرة، مع التقدم في السن مستوى إفراز التستوستيرون في الرجالة بيقل وده بيؤدي لظهور الكرش، كمان مستوى الإستراديول في الستات بيقل وده بيسبب تراكم الدهون في مناطق معينة من الجسم بدلًا من حرقها.

-       معدل الحرق: كتير بنسمع إن ناس بتاكل كتير ووزنهم مش بيزيد، ده غالبًا بيكون سببه إن معدل الحرق عندهم عالي أو متوازن، لو معدل الحرق عندك منخفض هيبدأ جسمك يخزن الدهون، وده اللي بيحصل لما بنكبر في السن إن معدل الحرق في جسمنا بيقل.

-       تآكل المفاصل: كل اللي بنعمله في شبابنا بنحس بيه لما نكبر، لو مش بتلتزم بعادات صحية سليمة تبقى بتعرض نفسك لأعراض تآكل المفاصل وضعف العضلات عند التقدم في السن، ده بيخلي التمارين الرياضية والنشاط الجسدي صعب وبالتالي الخمول هيسبب زيادة الوزن.

-       نقص النشاط البدني: مع التقدم في السن بعض الناس بيميلوا للخمول والراحة والابتعاد عن العادات الصحية السليمة زي المشي أو ممارسة الرياضة عمومًا، ده بيخلي الجسم يميل لتخزين الدهون أكتر وتبدأ مظاهر السمنة.

 

 ثانيًا إيه الحل؟

بعد ما عرفنا الأسباب نقدر نعرف الحلول:

-       فحص دوري لمستوى الهرمونات: الالتزام بفحص مستوى الهرمونات وخصوصًا الغدة الدرقية هيخلينا نكتشف بسرعة لو فيه سبب هرموني بيسبب زيادة الوزن، وساعتها هتبقى محتاج إما علاج دوائي بمستحضرات طبية أو تدخل جراحي حسب تقدير الطبيب المعالج.

-       اتباع نظام غذائي: الطبيب المتخصص في السمنة والتخسيس هيقدر معدل الحرق عندك ويديك الدايت المخصوص اللي يخلي جسمك لا يكتسب وزن زائد، خد بالك إن معدل الحرق ده مش حاجة ثابتة طول عمر الإنسان، لو ليك نظام غذائي معين بتتبعه من سنين طويلة لازم تتابع مع طبيب متخصص يفحص جسمك ويشوف لو محتاج بروتين أكتر أو كاربوهيدريتس أقل.

-       ممارسة رياضات معتدلة: لو عندك تآكل في المفاصل أو أي أعراض جسدية تانية بتمنعك من ممارسة الرياضة اللي كنت بتمارسها زمان، متوقفش رياضة لكن غير نوعها، فيه أنواع وأشكال كتير من الممارسات الرياضية الصحية المناسبة لكبار السن.

-       خلي الرياضة جزء من حياتك اليومية: العادات الصحية السليمة وممارسة الرياضة مش حاجة بنعملها مرة وخلاص، دي ممارسات يومية بتخلي حياتك كلها مليئة بالنشاط والحيوية.



صيدليات عابدين، مستشارك الأمين للصحة والجمال